Կոնսուլտացիաներ

01/10/2019

Հարգելի բժիշկ ունեմ տեսողական խնդիր՝ 2 աչքս էլ -2,5 է, ուզում եմ վիրահատել քիթս, բայց կարիք ունեմ մասնագիտական խորհրդի արդյոք քթի վիրահատությունը կազդի՞ տեսողության վրա և եթե այո, ապա պե՞տք է աչքերի վիրահատությունը կատարել, ապա նոր քթի՞: Շնորհակալ եմ նա

Բարև ձեզ, ձեր ունեցած խնդիրը էապես չի խանգարում և առավել ևս չի խորացնում աչքերի հետ խնդիրը, այսինքն կարող եք կատարել քթի վիրահատությունը: Խնդիրը միայն կայանում է նրանում, որ եթե դուք կրում եք օպտիկական ակնոցներ, ապա ցանկալի կլինի վիրահատությունից հետո մոտ 6 ամիս կրել օպտիկական լինզաներ:


01/10/2019

Հարգելի բժշկուհի, նորածնի մոտ ծնված օրվանից մեջքին կապտուկներ կան։ Մի ամիս է արդեն չի անցնում։ Դա վտանգավո՞ր է:

Առանց զննման դժվար է ախտորոշել կամ խոսել վտանգի առկայության մասին, բայց հավանաբար խոսքը <<Մոնղոլական բծերի>> մասին են, եթե այո ուրեմն անվտանգ է։ Ավելի հստակ կկարողանամ մանրամասն զննելուց հետո ասել: Առողջություն:


01/10/2019

Բարև Ձեզ հարգելի բժիշկ, ամուսնացել եմ 4 ամիս առաջ, սեռական հարաբերություն չի ստացվում։ Ամուսինս, երբ մոտենում է, ինձ մոտ մկանային լարվածություն և սթրես է առաջանում, ամուսնական առաջին գիշերը արյան կաթիլներ տեսել եմ, բայց անգամ չգիտեմ կուսաթաղանթս պատռվել է, թե՝ ոչ:

Ըստ Ձեր նկարագրության կարող եմ ենթադրել, որ ձեր մոտ առկա է վագինիզմ՝ երբ կնոջ կամքից անկախ տեղի է ունենում հեշտոցամուտքի մկանների կծկում, ինչը անհնարին է դարձնում սեռական անդամի ներհրումը: Վագինիզմը սեքսոլոգիական խնդիր է և անհրաժեշտ է դիմել սեքսոպաթոլոգի:


01/10/2019

Բարև ձեզ հարգելի բժշկուհի, ունեմ 3 բալիկ և 3 բալիկովս էլ մինչ հղիանալը ամուսնուս մոտ հայտնաբերվել է տրոմբոֆիեբիտ, ուզում եմ իմանալ արդյոք դա ժառանգական հիվանդություն է և կարող է երեխայի առողջության վրա որևէ ազդեցություն ունենալ: Նախապես շնորհակալություն:

Բարև ձեզ հարգելի հարցատու, ձեր ամուսնու տրոմբոֆիեբիտը երեխայի ընդհանուր առողջական վիճակի վրա չի ազդի, սակայն այդ հիվանդությունը չլինելով ժառանգական, ունի ընտանեկան նախատրամադրվածություն:


30/09/2019

Բարև ձեզ, ես մի հարց ունեմ: Իմ աչքերի դիմաց մանր սև կետիկներ են երևում: Ի՞ նչ կարելի է անել նման դեպքում: Շնորհակալ եմ նախապես:

Բարև Ձեզ։ Եթե ինչպես Դուք եք նշում, սև կետիկները աչքի շարժման հետ տեղաշարժվում են, ապա ամենայն հավանականությամբ դրանք ապակենման մարմնի լողացող պղտորումներ են և բուժման կարիք չունեն։


30/09/2019

Բարև Ձեզ, հարգելի բժիշկ հեպատիտ B-ի պատվաստումից հետո, արդյոք կարելի է հղիանալ, թե կարիք կա որոշ ժամանակ սպասել:

Բարև Ձեզ, հարգելի հարցատու հեպատիտ B-ի դեմ պատվաստվելը շատ ողջունելի է: Պատվաստումից հետո հղիանալու սահմանափակում չկա:


30/09/2019

Բարև Ձեզ, իմ բալիկը 2 ամսեկան է, և արդեն 20 օր է ինչ եղունգը գույնը փոխել է և սերտաճած տեսք ունի, սկզբում մի մատիկն էր, հետո մյուս մատիկին նույնպես հայտնվեց: Խնդրում եմ ասել, թե ի՞ նչ կարող եմ անել:

Բարև Ձեզ, հարգելի հարցատու, եթե երեխան նորմալ սնվում է, չունի ջերմություն և այլ անհագստացնող գանգատներ, կարծում եմ պետք է միայն ուշադրություն դարձնել ձեռքի մատերը բերանը դնելու սովորությանը, եթե դա էլ չկա, ապա պետք է հետազոտվել, չափազանց հազվադեպ լինում են նմանատիպ սնկային ախտահարումներ: Առողջություն:


30/09/2019

Բարև ձեզ, կարող եք ասել, թե ի՞նչ ավելացնել սննդակարգում, որպեսզի կարողանամ քաշ հավաքել:

Հարգելի հարցատու, պետք է փոխել ամբողջ սննդակարգը, մեկ երկու բան ավելացնելով չի լինի... Ձեր ամբողջ ընդունած սննդի կկալները պետք է ծախսածից շատ լինեն ու տևական ժամանակ, որ քաշ հավաքեք. ։ Դրա համար պետք է հաշվել Ձեր էներգոծախսը, հաշված սննդակարգ գրել և սկսել.... բնականաբար պետք է բացառել հիվանդությունների հետևանքով առաջացած քաշի դեֆիցիտը։


24/09/2019

Բարև Ձեզ, հարգելի բժիշկ խնդրում եմ ասել, ո՞ր օրերն են համարվում հղիանալու համար առավել հավանական:

Հղիանալու ամենահավանական օրերն են համարվում ձվազատման նախորդող և հաջորդող օրերը: Վերջինս տեղի է ունենում ցիկլի ուղիղ մեջտեղում, օրինակ 28 օրանոց ցիկլի դեպքում 14-րդ օրն է, 32 օրանոց ցիկլի դեպքում՝ 16-րդ օրը: Ձվազատման հարող 4 օրերը ամենառիսկայինն են: