Միջմիզուկային լազերային մասնահատման վիրահատության ընթացքը մեկնաբանում է բ.գ.թ. դոցենտ, Իզմիրլյան բժշկական կենտրոնի Ուրոլոգիական կլինիկայի ղեկավար Արթուր Գրաբսկին:
Բժիշկ Գրաբսկի, ներկայացրեք խնդրեմ, ի՞նչ վիրահատության եք պատրաստվում: Ի՞նչ խնդիր ունի հիվանդը:
Հիվանդն այս պահին պատրաստված է վիրահատության՝ շագանակագեղձի բարորակ գերաճի խնդրով: Հիվանդությունը հանդիպում է հիմնականում 50-ից բարձր տարիքային խմբի տղամարդկանց մոտ և դրսևորվում հատկապես միզարձակման խանգարումներով:
Ի՞նչ եղանակով է վիրահատությունն իրականացվում:
Վիրահատությունը կատարվում է ոլորտում առկա ժամանակակից մեթոդներից մեկով՝ միջմիզուկային լազերային մասնահատման միջոցով (THUVARP): Նմանատիպ վիրահատություններից, որոնք իրականացվում են հոսանքային տեխնոլոգիայով, սա տարբերվում է նրանով, որ իրականացվում է լազերային գործիքով: Սարքավորումն այս պահին միակն է Հայաստանում: Այս տեխնոլոգիան Իզմիրլյան ԲԿ-ում կիրառվում է 2012 թվականից:
Ի՞նչ առանձնահատկություն ունի աշխատանքն այս սարքով:
Այն ունի մի շարք առավելություններ, որոնցից կառանձնացնեմ հատկապես բուժման առավել մեծ արդյունավետությունը, արյան կորստի անհամեմատ կրճատումը: Վիրահատական այս միջամտությունից հետո հիվանդը շատ արագ է ապաքինվում՝ նույնիսկ 1 օր հետո կարող է անցնել իր առօրյային:
RevoLix-ը բավական թանկարժեք սարքավորում է, և կենտրոնում հայտնվել է մեր սփյուռքահայ բարեկամ, բժիշկ Կարո Դերձակյանի շնորհիվ:
Այս ցուցումով վիրահատություններն Իզմիրլյան բժշկական կենտրոնում իրականացվում են միայն լազերայի՞ն տարբերակով:
Այո, 90 % դեպքերում նմանատիպ վիրահատություններն իրականացնում ենք լազերային եղանակով, սակայն մյուս տեխնոլոգիաները ևս առկա են՝ մոնոպոլյար ՏՈՒՌ, բիպոլյար և լազերային:
Երկա՞ր վիրահատություն է սպասվում:
Վիրահատությունը կտևի մոտ 1 ժամ:
Doctors.am-ը մաղթում է հաջող վիրահատական ընթացք:
