Ձմեռ-գարուն ժամանակաշրջանը մաշկի համար դժվարին փորձություն է: Ցրտերի սեզոնին մաշկը թոշնած ու անփայլ տեսք է ստանում: Ջերմաստիճանի տատանումը, արևային լույսի անբավարարությունն ու վիտամինների պակասն արտահայտվում են արտաքինի վրա: Ու ոչ մի կոսմետիկ միջոց չի կարող քողարկել այս կամ այն վիտամինի պակասը: Մաշկի կարգին տեսքի համար օրվա սննդաբաժնում պետք է լինեն և՛ վիտամիններ, և՛ միկրոտարրեր: Իսկ թե ինչ կոնկրետ վիտամիններ են հարկավոր ձեր օրգանիզմին, կհուշի մաշկը: Այսպես:

Եթե մաշկն անհարթ է ու թեփոտում է, ապա դա խոսում է  օրգանիզմում նիկոտինաթթվի պակասի մասին (վիտամին РР): Նշանակում է,  որ օրվա սննդաբաժնում պետք է կոշտ աղացած ալյուրից պատրաստված հաց, ձավարեղեն ու լոբի օգտագործեք:

Չոր, անհարթ ու մուգ բծերով, տեղ-տեղ թարախակույտով մաշկը A վիտամինի (ռետինոլ) և A պրովիտամինի (կարոտին) կարիք է զգում: Այս վիտամինն անհրաժեշտ է մաշկի  և լորձաթաղանթի վիճակը  նորմալ  պահելու համար: Այն բավարար քանակությամբ կա լյարդի, գազարի, լոլիկի, ծիրանաչրի մեջ: Այդ վիտամինը շատ է նաև հում ձվի դեղնուցում: Կարոտին պարունակում են գրեթե բոլոր մրգերն ու հատապտուղները, որոնք ունեն վառ դեղին կամ կարմիր երանգավորում, ինչպիսիք են լոլիկը, չիչխանը, մասուրը, դդումը, բազուկը, ծիրանը ևն: Եթե մաշկն ասես կորցրել է առաձգականությունը ու թոշնած տեսք ունի, ապա դա խոսում է E վիտամինի պակասի մասին, որն այլ կերպ անվանում են «երիտասարդության վիտամին»: Դրանից մեծ քանակությամբ պարունակում են ձեթը, կանաչ բանջարեղենն ու գազարը:  Ձեթի ամենօրյա կիրառման դեպքում օրգանիզմն այդ պակասը կլրացնի:

Որպեսզի ատամներն ու ոսկրերը նորմալ վիճակում լինեն, օրգանիզմին անհրաժեշտ է D վիտամին (կալցիֆերոլ): Դրանից կա կարագի մեջ: Իսկ օրգանիզմում այդ վիտամինն առաջանում է արեգակի ճառագայթների ազդեցությամբ: Իսկ  C վիտամինի (ասկորբինաթթվի) գլխավոր աղբյուրը սև հաղարջն է, կարմիր քաղցր տաքդեղը, կաղամբը, նեխուրը, սպանախը: Սակայն պետք է հիշել, որ սխալ պահպանման դեպքում այդ բանջարեղենում C վիտամինն աստիճանաբար քայքայվում է:

B (1, 2, 6, 12) խմբի վիտամիների անբավարարության մասին  խոսում են մկանային հաճախակի կծկումները,  քայլելիս շուտ հոգնելը, բերանի անկյուններում հաճախակի առաջացող ճաքերը: Այդ վիտամինների մեծ քանակ  կա ձավարեղենի, ընկույզների, ցիտրուսազգիների ու կարտոֆիլի մեջ: Մսի, ձկան, կաթի, կաթնաշոռի, պանրի ու լյարդի մեջ նույնպես այդ խմբի վիտամիններ կան: Լնդերի արյունահոսությունը հուշում է P և PP վիտամինների անբավարարության  մասին, ընդ որում, այդ ժամանակ մաշկի վրա առաջանում է ցան, մշտական հոգնածության ու թուլության զգացում: Այդ դեպքում ճիշտ կլինի սննդաբաժնի մեջ հնդկահավի միս, հունական ընկույզ ու ընդեղեն ընդգրկել:

Ձմեռն ու գարունը մաշկի համար ամենախնդրահարույց ժամանակն են համարվում: Մաշկը անկենդան է դառնում: Խոնավացնող լոգանքները պետք է ամենօրյա պարտադիր գործողության վերածվեն: Տաք ջրի մեջ կարելի է ավելացնել  կաթի մեջ լուծված թուրինջի կամ նարնջի յուղ: Ավելի արագ արդյունքի հասնելու համար պետք է մեկ լոգանքի համար օգտագործել 1 լ անյուղ կաթ` մեկ  ճաշի գդալ մեղրով: Մի քանի պրոցեդուրայից հետո մաշկը ձեր աչքի առջև կվերափոխվի:

Ճարպոտ մաշկը ճարպի ավելցուկից հաճախ է բորբոքվում. առաջանում է անցանկալի փայլ, որն ուղեկցվում է տարաբնույթ ցանով: Նման մաշկը պարբերաբար պետք է մաքրել, կարելի է տարբեր դիմակներ պատրաստել. օրինակ` 2 ճաշի գդալ կեֆիրը, մեկ գդալ ալյուրն ու մեկ կիտրոնի հյութը խառնել, ստացված զանգվածը քսել դեմքին ու թողնել 15 րոպե: Ե՛վ դեմքի մաշկի գույնը կթարմանա, և՛ փայլը կնվազի:

Ankakh.com