Այս տարի Քնի համաշխարհային օրը նշվում է մարտի 19-ին: Օրվա կարգախոսն է «Կանոնավոր քուն, առողջ ապագա»: 

Ինչպես նշում են նախաձեռնության հեղինակները, Քնի համաշխարհային օրվա նպատակն է կոչ անել ոլորտի մասնագետներին իրազեկել հանրությանը քնի կարեւորության մասին:

Չափահասների համար նորմա է համարվում առնվազն յոթ ժամյա քունը: Եվ գաղտնիք չէ, որ քնի խանգարումները կարող են էականորեն ազդել մարդու կյանքի որակի վրա: Վեց ժամից քիչ քնողների շրջանում հիվանդությունների ռիսկը մեծանում է: Դրանք են՝

•    սիրտ-անոթային հիվանդություններ
•    հոգեհուզական դաշտի խնդիրներ (դեպրեսիվ, տագնապային խնդիրներ) 
•    եղած հոգեկան եւ սոմատիկ խնդիրների բարդացում
•    հիշողության եւ մտավոր ունակությունների վատացում
•    մետաբոլիկ շեղումներ
•    ճարպակալման ռիսկ
•    շաքարային դիաբետ եւ այլն:

Քնի խանգարումներից կարելի է խուսափել՝ պահպանելով քնի հիգիենայի կանոնները, որոնք են՝

•    ուշ ժամերին կոֆեին չօգտագործել (թեյ, սուրճ, կոլա, էներգետիկ ըմպելիքներ)
•    մեծ քանակի սնունդ չընդունել քնելուց առաջ, բայց եւ քաղցած չպառկել
•    շատ ակտիվ ֆիզիկական աշխատանք չանել քնելուց առաջ
•    անկողինն օգտագործել քնելու նպատակով, այլ ոչ թե գիրք կարդալու կամ ֆիլմ դիտելու համար (էկրանի լույսն ընկճում է նոր սկսվող քնի գործընթացը)
•    անկողնում երկար արթուն չմնալ:

Աղբյուրը՝ Doctors.am