Կրծքագեղձի քաղցկեղը կանանց մոտ ամենահաճախ հանդիպող ուռուցքային հիվանդությունն է: Այսօր ամբողջ աշխարհում բավական լուրջ քայլեր են ձեռնարկվում, ինչպես հիվանդության վաղ ախտորոշման, այնպես էլ բարձարակարգ բուժօգնության միջոցով բուժելիության ցուցանիշը բարելավելու նպատակով։ Կրծքագեղձի քաղցկեղի բուժելիությունը զարգացած երկներում մինչև 100%-ի է հասել՝ շնորհիվ վաղ ախտորոշման եւ արդիական բուժման: Մեր երկրում խնդիրը նույնպես արդիական է ու մասնագետների ուշադրության կենտրոնում: Բժիշկները նշում են, որ հատկապես կարևոր է կրծքագեղձի քաղցկեղի վաղ հայտնաբերումն ու ժամանակին իրականացված բուժումը: Այս թեմայով զրուցել ենք Բիոմեդ ախտորաշման լաբորատորիայի ճառագայթաբան Լիլի Պետրոսյանի հետ:
Բժշկուհի Պետրոսյան, նախ խնդրում եմ խոսենք, թե ի՞նչ է կրծքագեղձի քաղցկեղը և ի՞նչ տարածում ունի մեր երկրում:
Կրծքագեղձի քաղցկեղը կրծքագեղձի չարորակ նորագորացություն է, որը կանանց մոտ չարորակ գոյացությունների խմբում զբաղեցնում է առաջին տեղը։ Յուրաքանչյուր տարի Հայաստանի հանրապետությունում արձանագրվում է կրծքագեղձի քաղցկեղի մինչեւ 1100 առաջնային հիվանդ, եւ ինչպես շատ երկրներում, Հայաստանում եւս նկատվում է հիվանդացության դեպքերի աճ։
Նշեցիք որ նկատվում է հիվանդացության դեպքերի աճ խնդրում եմ նշել, թե հիմնականում, ո՞ր տարիքային խմբին պատկանող կանայք են գտնվում հիվանդության թիրախային խմբում:
Կրծքագեղձի քաղցկեղի դեպքերն այսօր մեր երկրում հիմնականում արձանագրվում են 40-ից բարձր տարիքային խմբում գտնվող կանանց շրջանում:: Սակայն լինում են դեպքեր նաև, երբ այս հիվանդությունը ախտորոշվում է ավելի երիտասարդ կանանց մոտ:
Բիոմեդ ախտորոշման լաբորատորիայում` Ձեր ամենօրյա աշխատանքի ընթացքում, վստահ եմ հաճախ եք ընդունում այցելուների, որոնք բախվել են այս խնդրին: Կարող եք առանձնացնել , թե հիվանդության, ո՞ր փուլում են հիմնականում կանայք դիմում բժշկի և ի՞նչ նշանակություն ունի հիվանդության վաղ հայտնաբերումը:
Այո, կանայք մեր կենտրոն շատ հաճախ են դիմում հետազոտվելու համար: Պետք է նշեմ, որ կրծքագեղձի քաղցկեղն ունի երկարատեւ նախակլինիկական շրջան եւ շատ կարևոր է, որ հենց այդ ընթացքում պացիենտը հետազոտվի և հիվանդությունը հայտնաբերվի վաղ փուլում, քանի որ վաղ փուլերում հայտնաբերման պարագայում բուժումը շատ ավելի արդյունավետ է լինում։
Որո՞նք են այն հետազոտությունները, որոնց միջոցով հնարավոր է վաղ հայտնաբերել կրծքագեղձի քաղցկեղը:
Բիոմեդ-ում մենք երիտասարդ կանանց առաջարկում ենք կատարել կրծքագեղձի ուլտրաձայնային հետազոտություն: Քանի որ կրծքագեղձի ուլտրաձայնային հետազոտությունը մեզ հնարավորություն է տալիս դեռեւս վաղ շրջանում հայտնաբերել կրծքագեղձի քաղցկեղը։ Թույլ տվեք նշել, որ 45 տ.-ից հետո արդեն կանանց ցուցված է իրականացնել մամոգրաֆիա։
Ի՞նչ դեր ու նշանակություն ունի ուլտրաձայնային հետազոտությունը կրծքագեղձի քաղցկեղի վաղ հայտնաբերման փուլում:
Ուլրտրաձայնային հետազոտությունը բարձր ինֆորմատիվություն ունեցող մեթոդ է, որը, ինչպես նշեցի արդեն, դեռեւս հիվանդության սկզբնական փուլում կարող է շատ էֆեկտիվ լինել:
Ի՞նչ հաճախականությամբ պետք է կատարվի ՈՒՁՀ-ն:
Պրոֆիլակտիկ նպատակով խորհուրդ է տրվում կատարել ՈւՁՀ տարին 1 անգամ։ Իսկ եթե կա խնդիր, ապա ըստ բժշկի ցուցման անհրաժեշտ կլինի իրականացնել հետազոտությունը 6 ամիսը մեկ անգամ։
Բժշկուհի Պետրոսյան, խնդրում եմ նշել, թե ու՞մ և երբ է ցուցված կրծքագեղձի ուլտրաձայնային հետազոտությունը:
Այս հետազոտությունը ցուցված է ցանկացած անձի, ով ունի կրծքագեղձի շրջանում ցավ, ծանրության, դիսկոմֆորտի զգացողություն, պտուկներից արտադրություն։
Իսկ արդյոք կա՞ն հակացուցումներ կամ դեպքեր, երբ ՈՒՁՀ-ն այլևս ինֆորմատիվ չէ:
Ոչ, պետք է նշեմ, որ ՈւՁՀ-ն այն եզակի հետազոտություններից է, որը չունի որեւէ հակացուցում։ Պարզապես պետք է մեր ընթերցողներին խորհուրդ տամ, որ շատ ուշադիր լինեն իրենց առողջության նկատմամբ և ամնեաչնչին գանգատի դեպքում անգամ անմիջապես դիմեն բժշկի: Հաջորդ կարևոր խորհուրդն էլ այն է, որ տարին մեկ անգամ պրոֆիլակտիկայի համար իրականացնեն կրծքագեղձի ուլտրաձայնային հետազոտություն:
Աղբյուրը՝ DOCTORS.am