Այսօր մանկաբույժների օրն է
Նոյեմբերի 20-ն ամբողջ աշխարհում նշվում է որպես մանկաբույժների օր։ Մանկաբուժությունը բժշկության յուրահատուկ ուղղություններից է․ չէ՞ որ այս մասնագետներն ուղեկցում են փոքրիկներին կյանքի առաջին իսկ օրերից, օգնում նրանց աճել, զարգանալ և հաղթահարել տարբեր հիվանդություններ։
Մանկաբույժների աշխատանքը ենթադրում է լինել ավելի համբերատար, կարեկից և նրբանկատ, քանի որ փոքրիկները միշտ չէ, որ կարողանում են բացատրել, թե ինչն է իրենց անհանգստացնում։
Այս մասնագետների գործն ունի ևս մեկ կարևոր բաղադրիչ․ նրանք նաև սովորեցնում են ծնողներին ճիշտ խնամել իրենց երեխաներին և աջակցել նրանց ամենադժվար իրավիճակներում:
Մի փոքր պատմական ակնարկ
«Պեդիատրիա» բառը նշանակում է «երեխաներ բժշկող»։
Այն առաջացել է երկու հունարեն բառերից՝ (pais = երեխա) և (iatros = բժիշկ կամ բուժող):
Մանկաբուժությունը, որպես բժշկության առանձին ոլորտ, անմիջապես չի ձևավորվել։ Մինչեւ 18-րդ դարը երեխաներին հաճախ բուժում էին նույն կերպ, ինչ մեծահասակներին, ինչը ոչ միշտ էր արդյունավետ։ Միայն ավելի ուշ բժիշկները սկսեցին հասկանալ, որ երեխայի օրգանիզմը հատուկ մոտեցում է պահանջում։
Մանկաբուժության հայրը համարվում է Աբրահամ Յակոբին, որը 19-րդ դարի կեսերին դրեց ժամանակակից մանկական բժշկության հիմքերը։
Մանկաբուժությունը տարեցտարի գրանցում է նոր հաջողություններ, հայտնվում են ախտորոշման և բուժման ավելի արդյունավետ տարբերակներ: Բայց չնայած այս ամենին՝ մարդկային ջերմությունն ու կարեկցանքը մնում են մանկաբույժի հիմնական «գործիքները»:
Որպես վերջաբան՝ ներկայացնում ենք նաև մի քանի խորհուրդներ մանկաբույժներից․
- Մի՛ մոռացեք կանոնավոր ստուգումների մասին, նույնիսկ եթե ձեր երեխան առողջ է թվում: Կանխարգելիչ այցերը լուրջ հիվանդություններից խուսափելու լավագույն միջոցն են։
- Փորձե՛ք վստահելի հարաբերություններ հաստատել մանկաբույժի հետ, որպեսզի երեխան իրեն հարմարավետ զգա այցի ժամանակ:
- Հիշե՛ք՝ երեխաների առողջության պահպանման համար կարևորագույն նշանակություն ունեն ոչ միայն գրագետ բուժումը, այլ նաև ձեր սերը, խնամքը և ուշադրությունը։
Ի դեպ, եթե փնտրում եք մանկաբույժների կամ օգտակար ինֆորմացիա ձեր փոքրիկների առողջության վերաբերյալ, ապա կարող եք անել դա մեր կայքի շնորհիվ
