Քննական շրջանը մեկնարկել է, ինչը նշանակում է, որ հատկապես ուսանողները կարիք ունեն կենտրոնացվածության, ուղեղի լավ աշխատանքի եւ հիշողության ակտիվացման, ինչն այդքան էլ չի հաջողվում Ամանորի նախապատրաստական շրջանում:
Ի՞նչ անել, եթե մտքերը ցրված են, եւ ոչ մի կերպ չի ստացվում կենտրոնանալ պարապմունքների վրա:
Առաջարկում ենք սննդակարգում ավելացնել որոշ մթերքներ, որոնք կօգնի թարմացնել հիշողությունն ու արագացնել ուղեղի աշխատանքը:
Կոֆեին
Իհարկե, մարդու IQ-ն բարձրացնելու համար չկա կախարդական բաղադրատոմս, սակայն կոֆեինը կարող է էներգիայով ապահովել Ձեզ եւ օգնել կենտրոնանալ: Չնայած՝ կոֆենի ազդեցությունը կարճատեւ է, իսկ դրա չարաշահումը՝ ոչ այնքան ցանկալի:
Շաքար
Շաքարն ուղեղի համար անփոխարինելի է, բայց ոչ այն շաքարը, որը կա Ձեր սեղանի վրա, այլ գլյուկոզան, որն օրգանիզմը ստանում է Ձեր ընդունած շաքարից եւ ածխաջրերից: Մեկ բաժակ քաղցր հյութը կարող է կարճ ժամանակով ակտիվացնել հիշողությունը եւ մտածողությունը: Սակայն այստեղ էլ պետք է հիշել չափը չանցնելու մասին:
Նախաճաշ
Ուղեղի լավ աշխատանքի համար նախաճաշելը պարտադիր է: Ուսումնասիրությունները ցույց են տվել, որ նախաճաշը կարող է լավացնել կարճ հիշողությունը եւ ուշադրությունը: Նախաճաշը պետք է պարունակի ամբողջական հացահատիկ, կաթնամթերք, մրգեր:
Ձուկ
Ձուկը հարուստ է օմեգա 3-ով, ինչն ուղեղի աշխատանքի բանալին է: Օմեգա 3 ճարպաթթուն նվազեցնում է նաեւ ինֆարկտի ռիսկը, բացի այդ, լավացնում է հիշողությունը, որը տարիքի հետ անհրաժեշտ է բոլորին:
Ուղեղի եւ սրտի լավ աշխատանքի համար խորհուրդ է տրվում ձուկ ուտել շաբաթական երկու անգամ:
Ընկույզ եւ շոկոլադ
Ընկուզեղենը վիտամին E-ի աղբյուր է, իսկ դառը շոկոլադն անտիօքսիդանտի հատկություններ ունի եւ պարունակում է կոֆեին, որոնք էլ նպաստում են կենտրոնացմանը: Օրական մեկ անգամ շոկոլադ եւ ընկուզեղեն կերեք, որպեսզի ստանաք անհրաժեշտ էներգիա՝ օգտագործելով մինիմալ կալորիաներ:
Ճիշտ կենսակերպ
Բացի ճիշտ սննդակարգից, անհրաժեշտ է նաեւ ճիշտ կենսակերպ վարել՝ խմել շատ ջուր, լիարժեք քնել, մեդիտացիա անել եւ մտածողության զարգացմանը նպաստող վարժություններ:
Աղբյուրը՝ Webmd.com
