Մեր օրերում, ամառ թե ձմեռ, խանութներում վաճառվում են բազմազան մրգեր, հաճախ էկզոտիկ` բերված հեռավոր երկրներից: Էկզոտիկ մրգերը, որպես կանոն, վիտամիններով հարուստ են, սակայն դիետոլոգների կարծիքով մինչև երեք տարեկան հասակը երեխային ցանկալի չէ նման մրգեր տալ: Նախ, հեռավոր երկրներից բերված մրգերը բազմակի քիմիական մշակման են ենթարկվում` տեսքը և թարմությունը պահելու համար, բացի այդ, դրանք փոքրիկի մոտ կարող են ալերգիկ ռեակցիա առաջացնել:
Հատկապես մինչև մեկ տարեկան երեխային ցանկալի է տալ տեղում` տվյալ բնակլիմայական պայմաններում աճող մրգեր: Օրինակ, վիտամիններով հարուստ ու օգտակար մրգեր են խնձորը, տանձը, սալորը, ծիրանը:
Խնձորը պարունակում է կալիում, երկաթ և վիտամին C:
Մեկ տարեկանից բարձր երեխաներին կարելի է տալ կանաչ խնձոր` կեղևով, որը շատ օգտակար է: Իսկ ամենափոքրերի համար խնձորը պետք է քերել կերակրելուց անմիջապես առաջ` օգտակար նյութերը պահպանելու համար:
Իսկ նախադպրոցական տարիքի երեխային կարելի է թույլ տալ, որ նաև խնձորի կորիզները ծամի. Դրանք յոդի հարուստ աղբյուր են:
Տանձը հարուստ է ֆրուկտոզայով, A խմբի վիտամիններով, կարոտինով և բջջանյութով:
Ունի հակաբիոտիկ և հակաբորբոքային հատկություն, ուստի հաճախ է ներառվում երեխայի սննդացանկում հիվանդությունից հետո:
Դիետոլոգների կարծիքով տանձի միջուկը փոքրիկի օրգանիզմն ավելի հեշտ է մարսում, անգամ խնձորից էլ դյուրամարս է:
Տանձի հյութն օգտագործում են որպես միզամուղ, իսկ կիսելները մանկական փորլուծության դեպքում:
Այս միրգը շատ օգտակար է թույլ երեխաների համար, քանի որ եթերային յուղերի շնորհիվ հեշտությամբ վերականգնում է օրգանիզմի ուժերը, հանում հոգնածությունը:
Ամենակարևորը` ճաշից առաջ երեխային տանձ տալ չի կարելի, միայն ուտելուց մեկուկես-երկու ժամ անց: Տանձ ուտելուց հետո ջուր չեն խմում և չեն ուտում միս:
Ծիրանը կալիումի, կալցիումի, երկաթի, B խմբի վիտամինների աղբյուր է:
Ծիրանը երկարակեցության միրգ է համարվում, քանի որ այն օրգանիզմի արյունատար համակարգին նույնքան օգտակար է, որքան 200 գրամ լյարդը:
Ծիրանը կարգավորում է ստամոքսի աշխատանքը, ապահովում են մաշկի գեղեցիկ գույնը և փոքրիկի լավ տեսողությունը:
Սալորը պարունակում է օրգանական թթուներ, ֆոսֆոր, վիտամին P:
Սալորը փոքրիկի սննդակարգում կարևոր է, քանի որ այն օրգանիզմից դուրս է հանում աղի, ջրի և նատրիումի ավելցուկը: Օրական երկու սալորը կանխարգելում է սիրտ-անոթային հիվանդությունները և երիկամային անբավարարությունը: Այն նաև ստամոքսն ախտահանող և մարսողությունը լավացնող հատկություն ունի:
impoqrik.am
