Մարտի 11-ը համաշխարհային առողջապահության օրացույցում նշվում է որպես Երիկամի օր:

Օրվա նպատակը երիկամային հիվանդությունների արդյունավետ բուժման վերաբերյալ իրազեկվածության բարձրացումն է, պացիենտների իրավունքների եւ հնարավորությունների ընդլայնումը, որի նպատակն է երիկամային հիվանդություններ ունեցող անձանց ակտիվ կենսակերպի ապահովումը: 

Հայտնի է, որ երիկամային հիվանդությունների ուշ ախտորոշումը եւ բուժումն էական ազդեցություն են ունենում կյանքի որակի վրա:

Երիկամային մի շարք հիվանդություններ առաջացնում են կողմնակի խնդիրներ, ինչպես, օրինակ, հոգնածությունը, դեպրեսիան, կոգնիտիվ խանգարումները, աղեստամոքսային տրակտի եւ քնի հետ կապված խնդիրները եւ այլն:

Հատկանշական է, որ ճարպակալում ունեցող մարդիկ երիկամային հիվանդությունների ռիսկի խմբում են եւ հատկապես նրանք, ովքեր ունեն դիաբետ եւ հիպերտենզիա:

Ամենից տարածված երիկամային հիվանդություններն են՝

•    միզաքարային (երիկամաքարային) հիվանդություններ
•    երիկամային անբավարարություն
•    նեֆրոպաթիա
•    պիելոնեֆրիտ
•    հիդրոնեֆրոզ

Երիկամային հիվանդություններն ուղեկցվում են որոշ ախտանիշերով, որոնց առկայության դեպքում պետք է դիմել բժիշկի:

Դրանք են՝

•    դժվարացած միզարձակություն
•    հաճախամիզություն կամ անմիզություն
•    մեզի մեջ արյան առկայություն
•    բարձր զարկերակային ճնշում
•    մարմնի բարձր ջերմություն
•    վերջույթների եւ դեմքի այտուցվածություն:


Աղբյուրը՝ Doctors.am