Միքայելյան վիրաբուժության ինստիտուտի ուրոլոգիական բաժանմունքը հնարավորություն ստացավ իրականացնել ներմիզուկային մասնահատման վիրահատություններ՝ բիպոլյար եղանակով: Ինստիտուտի կողմից ձեռք են բերվել նմանատիպ վիրահատության համար անհրաժեշտ՝ գերմանական հայտնի «Karl Storz» ընկերության արտադրության սարքավորումներ:
Doctors.am-ը ներկա է գտնվել ինստիտուտում այս եղանակով իրականացվող առաջին վիրահատությանը. ներկայացնում է ուրոլոգ, բ.գ. դոկտոր-պրոֆեսոր, Միքայելյան վիրաբուժության ինստիտուտի փոխտնօրեն Ռուբեն Բորոյանը:
Պրոֆեսոր Բորոյան, ներկայացրե՛ք, խնդրեմ՝ ի՞նչ վիրահատություն է սպասվում:
Մենք այժմ կատարելու ենք շագանակագեղձի ներմիզուկային մասնահատում: Սա էնդոսկոպիկ վիրահատություն է, որը, կարելի է ասել, շագանակագեղձի գերաճի դեպքում վիրաբուժական բուժման ոսկե չափանիշ է համարվում:
Վիրահատությունը կարելի է իրականացնել էլեկտրոէներգիայի տարբեր աղբյուրներով՝ ավանդական մոնոպոլյար, լազերային եղանակներով և բիպոլյար՝ ինչպիսին այսօր ենք իրականացնելու:
Որքա՞ն է տևում վիրահատությունը: Այս սարքավորումով աշխատանքը ենթադրու՞մ է արդյոք ժամանակային սահմանափակում:
Այս վիրահատությունը սովորաբար տևում է շուրջ 1 ժամ: Բիպոլյար եղանակի առավելությունը՝ մոնոպոլյարի համեմատությամբ, վիրաբույժին ժամանակի մեջ չսահմանափակելն է: Կարելի է աշխատել ավելի երկար, հետևաբար՝ գերաճի ենթարկված շագանակագեղձի ավելի մեծ ծավալուն մասնահատում իրականացնել:
Վիրահատությունը սկսում ենք, իհարկե, օպերացիոն դաշտի գնահատումից: Սրանք էնդոսկոպիկ գործիքներն են:
Նման պաթոլոգիան ունի՞ տարիքային սահման: Ո՞րն է, ընդհանուր առմամբ, դրա առաջացման պատճառը:
Սա տարեց տղամարդկանց բնորոշ հիվանդություն է: Շագանակագեղձի գերաճի առաջացման միակ ապացուցված ռիսկի գործոնը տարիքն է: Տարիքի հետ խախտվում է տղամարդու հորմոնային (տեստոստերոնի) համաչափությունը, և քանի որ շագանակագեղձի աճը կանոնարկվում է անդրոգեն հորմոնի և դրա տեսակների համաչափությամբ, այն համաչափության տարիքային փոփոխությունները հանգեցնում են շագանակագեղձի գերաճի:
Որպես կանոն՝ հիվանդությունը հանդիպում է 50-ից բարձր տարիքային խմբի տղամարդկանց մոտ: Ցավոք, վերջին տարների նկատվում է հիվանդության երիտասարդացում:
Որո՞նք են հիվանդության ախտանիշները: Ինչպե՞ս է այն դրսևորվում:
Վիրահատական սարքավորումները գերմանակայն հայտնի «Karl Storz» ընկերության արտադրանք են: Այն՝ Միքայելյան վիրաբուժության ինստիտուտի կողմից ձեռք է բերվել բոլորովին վերջերս:
Չնայած ամբողջ աշխարհում տեխնոլոգիական նորարարություններին, այս հիվանդության բուժումն իրականացվում է արդեն իսկ ոսկե չափանիշ դարձած ներմիզուկային մասնահատման եղանակով:
Իսկ հնարավո՞ր է այդ հյուսվածքների վերականգնումը հետագայում: Բուժումը երաշխավորում է արդյո՞ք երկարատև արդյունք:
Տեսականորեն, իհարկե, հնարավոր է նման բան, սակայն գործնականում այս խնդիրը չենք ունենում:
Տեսնում ենք, որ արյան կորուստը մեծ չէ: Սա կարող ենք համարել վիրահատության այս եղանակի առավելություններից:
Այո, իհարկե: Այս դեպքում արյան կորուստն անհամեմատ ավելի փոքր է:
Վիրահատությունից հետո ինչպե՞ս է կազմակերպվում հիվանդի հիվանդանոցային խնամքը: Ե՞րբ կարելի է վերադառնալ առօրյային:
Հետվիրահատական ապաքինումը շատ արագ է ընթանում, քանի որ վիրահատական այս եղանակն ապահովում է էլեկտրովիրաբուժական վերքի շատ արագ լավացում: Սովորաբար հիվանդանոցային խնամքը տևում է 2-3 օր:
Վաղու՞ց է մեր երկրում իրականացվում ներմիզուկային մասնահատման վիրահատությունը՝ բիպոլյար եղանակով:
Բիպոլյար մասնահատման տեխնոլոգիան մեր երկրում ներդրվել է բոլորովին վերջերս և կիրառվում է 2-3 կլինիկայում: Աշխարհում ևս, այն նոր մեթոդ կարելի է համարել: Իսկ ահա ներմիզուկային մասնահատման մոնոպոլյար վիրահատություններ Հայաստանում իրականացվում է վաղուց՝ 1986 թվականից: Ընթացքում կատարելագործվել է և՛ կատարման տեխնիկան, և՛ մասնագիտական հմտությունները: Սա վստահորեն կարող եմ համարել փորձկախյալ վիրահատություն:
Doctors.am-ը ևս մեկ անգամ շնորհավորում է՝ սարքի ձեռքբերման առիթով: Մաղթում ենք հաջող վիրահատություններ և մասնագիտական նորանոր ձեռքբերումներ:
Շնորհակալ ենք: Միքայելյան վիրաբուժության իսնստիտուտի համար այս սարքի առկայությունը կարելի է համարել, իհարկե, մեծ ձեռքբերում: Սա մեծ և կարևոր քայլ է մեր ուրոլոգիական բաժանմուքի տեխնիկական վերազինման գործում: Ուրախալի է նշել, որ բիպոլյար եղանակով կատարվող այս վիրահատությունը, ընձեռելով բավական մեծ հնարավորություններ, ինքնարժեքով գրեթե չի տարբերվում մոնոպոլյար տարբերակից, հետևաբար՝ գնի զգալի տարբերություն չկա:
Հիշեցնենք նաև, որ ներմիզուկային մասնահատման վիրահատությունը ցուցված է նաև միզապարկի նորագոյացությունների, ներառյալ՝ մակերեսային քաղցկեղի դեպքում: