Երբ ձեր մտերիմների երեխան հիվանդանում է քաղցկեղով, ապա թվում է թե նրանց համար չկա որևէ մխիթարիչ խոսք՝ որ օգնության ցանկացած փորձ միանշանակ ձախողված է, սակայն այդպես չէ: Անկախ ամեն ինչից, ծայրահեղ իրավիճակում հայտնված այս մարդիկ իրականում ամեն տեսակ օգնության կարիք էլ ունեն, պարզապես այդ պահին ամենաքիչն են մտածում այդ մասին: Օգնությունը պետք է տրամադրել նրբանկատորեն, դա շատ կարևոր է:
Ձեզ ենք ներկայացնում այս խնդրի հետ առնչված ծնողների կարծիքների հիման վրա կազմված խորհուրդներ, որոնք անպայման կօգնեն ձեզ ճիշտ օգնություն տրամադրել:
Հաղորդակցություն
- Երբեմն ուղղակի լինել ծնողների կողքին և ոչինչ չասել:
- Հաճախ ասել, որ դուք իրենց կողքին եք և նրանք կարող են ձեզ վրա հույս դնել:
- Հիշել բուժման հետ կապված կարևոր իրադարձությունների մասին, նախապես զանգահարել և հաջողություն մաղթել:
- Կարելի է նաև նկարահանել փոքրիկ քաջալերող տեսանյութեր և ուրախացնել երեխային և ծնողներին:
- Խոսել առանց քաղցկեղի «նորմալ» կյանքի մասին. Դա կարող է լինել թեկուզ կենցաղային խոսակցություն, կարևոր չէ: Քաղցկեղով հիվանդ երեխաներից մեկի մայրը խոստովանել էր. «Ես այդպես զգում էի, որ կա նաև այլ կյանք՝ կյանք առանց այս դժոխքի»:
Օգնություն հիվանդանոցում
- Հիվանդանոց բերել անհրաժեշտ իրեր:
- Փոխարինել հիվանդանոցում՝ թեկուզ մի քանի ժամով:
- Հիվանդանոց բերել տանը պատրաստված սնունդ:
- Օգնել դեղորայքի գնման հարցում:
- Վերցնել պունկցիայի համար անհրաժեշտ կենսանյութերը և տեղափոխել լաբորատորիա:
- Հաճախ օգնել մեքենայով տեղափոխման հարցում:
Երեխաներ
- Ժամանակ անցկացնել մյուս երեխաների հետ, անել ամենը, որպեսզի իրենց ընկճված չզգան:
- Այցելել հիվանդ երեխային, խաղալ նրա հետ, ցույց չտալով, որ նրա հետ ինչ-որ բան այն չէ:
Երեխայի համար զբաղմունքի միջոցներ մտածել: Օգնել ծնողներին հատկապես քիմիաթերապիայից հետո խնամել երեխային:
Հանգիստ՝ հիվանդանոցային կյանքից դուրս
- Այնպես կազմակերպել, որ ծնողները կարողանան գոնե մի քանի ժամ հանգստանալ առանց երեխաների:
- Ծնողներին նվիրել ձեռագործության միջոցներ, միգուցե դա օգնի նրանց չկենտրոնանալ վատ մտքերի վրա:
Միգուցե այս խորհուրդները ձեզ շատ պարզ թվան, բայց իրականում օգնությունը կարող է շատ պարզ հարցերի մեջ լինել: