Եթե Դուք վերջերս եք մայրացել եւ ցանկանում եք կրծքով կերակրել Ձեր երեխային, ապա հավանաբար հարյուրավոր խորհուրդներ եք լսել Ձեր սնվելու վերաբերյալ: Սովորաբար այդ սննդակարգերը անհատական են լինում՝ հիմնված սեփական փորձի վրա, բայց ահա, թե ինչ են խորհուրդ տալիս մասնագետները ԿԿ մայրերին:
Եվ այսպես, ի՞նչ ընդգրկել եւ ի՞նչ բացառել սննդակարգից, եթե Դուք կերակրող մայր եք:
Ձուկ
Ձուկը սպիտակուցի հրաշալի աղբյուր է, իսկ դրա որոշ տեսակներ օրգանիզմն ապահովում են օմեգա 3-ով, որն այնքան անհրաժեշտ է մեզ: Սակայն պետք է խուսափել այնպիսի ծովամթերքից, որը սնդիկ է պարունակում:
Կծու համեմունքներ
Սիրո՞ւմ եք կծու սոուսներ: Որոշ երեխաներ կարող են նորմալ տանել այդ համեմունքները, սակայն եթե Ձեր երեխան գազեր ունի, կամ նման սնունդ ընդունելուց հետո երեխայի մոտ դիարեա է առաջանում, ապա ժամանակն է հանել դրանք սննդակարգից:
Կանաչեղեն
Կանաչեղենի որոշ տեսակներ կարող են ազդել կաթի արտադրության վրա: Մաղադանոսն, օրինակ, կարող է նվազեցնել լակտացիան:
Թեյ
Թեյը կոֆեին է պարունակում, որը կարող է ազդել Ձեր եւ երեխայի քնի վրա: Այն կարող է դժվարացնել նաեւ երկաթի յուրացումն օրգանզիմի կողմից, որն անհրաժեշտ է էներգիայի համար: Թեյ խմելիս աշխատեք երկաթ պարունակող սնունդ չընդունել:
Ջուր և գազավորված ըմպելիքներ
Կրծքով կերակրելու ընթացքում Դուք կարող եք սովորականից ավելի շատ ծարավ զգալ: ԿԿ ընթացքում կարող եք պարբերաբար ջուր խմել, բայց ոչ երբեք գազավորված, քաղցր ըմպելիքներ եւ բնական հյութեր:
Ալկոհոլ
Երեխայի համար իդեալական է, երբ մայրիկը չի խմում, սակայն եթե, այնուամենայնիվ, ալկոհոլ եք օգտագործել, մինչ երեխային կրծքով կերակրելը գոնե երեք ժամ սպասեք, որպեսզի կաթն ամբողջությամբ մաքրվի ալկոհոլից:
Գազեր առաջացնող սնունդ
Որոշ մթերքներ, ինչպես օրինակ, լոբազգիները, կաղամբը, բրոկոլին, գազեր են առաջացնում, եւ եթե Ձեր երեխան գազեր ունի, ապա պետք է սահմանափակել նման սննդի ընդունումը որոշ ժամանակով:
Շոկոլադ եւ սուրճ
Այս երկուսն էլ կոֆեին են պարունակում, ինչպես թեյը եւ կոլան, սակայն եթե Դուք առանց Ձեր սիրելի լատեի օրը չեք պատկերացնում, ապա սահմանափակվեք օրական 2-3 բաժակ եռացրած սուրճով կամ առանց կոֆեին սուրճով:
Աղբյուրը՝ WebMD.com
