Քնի որակը կարևոր դեր է խաղում մեր ընդհանուր առողջության մեջ, սակայն քնելու դիրքը ևս մեծ ազդեցություն ունի, քանի որ օգնում է նվազեցնել մեջքի և պարանոցի ցավերը, խուսափել խռմփոցից և բարելավել շնչառությունը: Յուրաքանչյուր դիրք ունի իր առավելություններն ու թերությունները, իսկ ընտրությունը կախված է անհատական կարիքներից:
Մեջքի վրա քնելը․ լավագույն դիրքը ողնաշարի առողջության համար
Մեջքի վրա քնելը համարվում է լավագույն դիրքերից մեկը, քանի որ այս դեպքում մարմնի քաշը հավասարաչափ է բաշխվում և պահպանվում է ողնաշարի բնական կորությունը:
Առավելություններ․
- Նվազեցնում է մեջքի և պարանոցի ցավերը,
- Կանխում է մաշկի վաղաժամ ծերացումը, քանի որ դեմքը չի շփվում բարձի հետ,
- Կարող է օգնել նվազեցնել այրոցի զգացումը։
Ինչպես բարելավել այս դիրքը․
- Տեղադրեք բարձ ծնկների տակ՝ ողնաշարի ճիշտ կորությունը պահպանելու համար
- Խուսափեք չափազանց մեծ բարձերից, որոնք կարող են լարվածություն առաջացնել պարանոցի հատվածում։
Այս դիրքը հարմար է նրանց համար, ովքեր ունեն ողնաշարի խնդիրներ կամ հաճախ են զգում պարանոցի ցավեր: Սակայն այն կարող է վատթարացնել քնի ապնոէն (շնչառության դադարները քնի ժամանակ), ուստի ապնոէ ունեցողներին խորհուրդ է տրվում քնել կողքի վրա:
Կողքի վրա քնելը․ լավագույն ընտրությունը շնչառական խնդիրների և հղիության ժամանակ
Կողքի վրա քնելը ամենատարածված դիրքերից մեկն է և ունի մի շարք առավելություններ:
Առավելություններ․
- Նվազեցնում է խռմփոցը և բարելավում է շնչառությունը,
- Հարմար է հղի կանանց համար։
Ինչպես բարելավել այս դիրքը
- Տեղադրեք բարձ ծնկների միջև, որպեսզի ողնաշարը ճիշտ դիրքում մնա,
- Խուսափեք կզակը կրծքավանդակին շատ մոտեցնելուց, քանի որ դա կարող է լարվածություն առաջացնել պարանոցում
Ձախ կողմի վրա քնելը համարվում է ավելի օգտակար, քանի որ այն բարելավում է արյան շրջանառությունը;
Փորի վրա քնելը․ ամենավատ տարբերակը պարանոցի համար
Չնայած որոշ մարդիկ նախընտրում են այս դիրքը, այն խորհուրդ չի տրվում, քանի որ կարող է լուրջ խնդիրներ առաջացնել:
Թերություններ
- Պարանոցը շրջված է լինում մի կողմի վրա, ինչը կարող է ցավեր առաջացնել,
- Մեջքի ստորին հատվածը ենթարկվում է մեծ ճնշման, ինչը կարող է ցավի պատճառ դառնալ,
- Կարող է վատթարացնել մաշկի վիճակը, քանի որ դեմքը մշտական շփման մեջ է բարձի հետ։
Ինչպես բարելավել այս դիրքը
- Եթե այլ կերպ չեք կարողանում քնել, փորձեք օգտագործել բարակ բարձ կամ ընդհանրապես չօգտագործել բարձ,
- Դիրքափոխվեք կողքի կամ մեջքի վրա քնելու համար, եթե հաճախ եք զգում ցավեր։
Ինչպե՞ս ընտրել ճիշտ քնի դիրքը
Լավագույն դիրքը կախված է ձեր առողջական կարիքներից.
- Եթե հաճախ եք զգում մեջքի ցավեր, փորձեք քնել մեջքի վրա։
- Եթե ունեք շնչառական խնդիրներ, քնի ապնոէ կամ խռմփոց, ապա կողքի վրա քնելը լավագույն տարբերակն է։
- Եթե ունեք ստամոքսի այրոց, փորձեք քնել ձախ կողքի վրա։
- Եթե քնում եք փորի վրա և զգում եք պարանոցի կամ մեջքի ցավ, մտածեք այլ դիրք ընդունելու մասին։
Ճիշտ քնի դիրքը կարող է էականորեն բարելավել ձեր քնի որակը և օգնել խուսափել ցավերից ու անհանգստություններից:
