Հղիության ընթացքում կնոջ մարմինն անընդհատ փոփոխության է ենթարկվում, ինչը որոշակի անհարմարություններ է առաջացնում: Որոշ անհարմարություններ կարող են առաջանալ հղիության առաջին շաբաթների ընթացքում, իսկ որոշներն՝ այն ժամանակ, երբ ծննդաբերությունն արդեն մոտ է:
Ցավ որովայնում
Որովայնի երկու կողմերում սուր, ծակող ցավն առաջանում է աճող արգանդը պահող հյուսվածքի ձգման հետևանքով: Այդ ցավերը կարող են տարածվել ներքև՝ ընդգրկելով նաև ազդրերը և ոտքերը:
Շրջանաձև կապանի ցավ
Շրջանաձև կապանի ցավը հիմնականում առաջանում է հղիության երկրորդ եռամսյակում: Ազդրերի և որովայնի երկու կողմերում առաջացող սուր ցավը տարածվում է նաև աճուկի շրջանում: Շրջանաձև կապանում առաջացող ցավերը համարվում են հղիության բնականոն ընթացք:
Մկանների ձգվածություն
Արգանդի մկանները սկսում են ձգվել հղիության 4-րդ ամսում:
Խորհուրդներ
- Փորձեք մերսումներ անել,
- Համոզվեք, որ օրգանիզմում հեղուկի բավարար քանակություն կա,
- Փոխեք ձեր դիրքը կամ ակտիվությունը, մինչև որ ձեզ ավելի հարմարավետ կզգաք,
- Խուսափեք կտրուկ շարժումներից,
- Եթե որովայնում հանկարծակի ցավ եք զգում, ապա թեքվեք դեպի ցավող կետը, որպեսզի մկանների լարվածությունն անցնի և հյուսվածքները թուլանան,
- Փորձեք հանգստանալ:
- Եթե ցավը շատ ուժեղ է և երկարատև, ապա անհապաղ դիմեք բժշկի:
Մեջքի ցավ
Մեջքի ցավը հաճախ առաջանում է մեջքի մկանների լարվածության, հորմոնալ փոփոությունների և կեցվածքի փոփոխության հետևանքով:
Խորհուրդներ
- Խուսափեք բարձրակրունկ կոշիկներից. կրեք ոչ տափակ, մի փոքր բարձրություն ունեցող կոշիկներ,
- Խուսափեք ծանրություն բարձրացնելուց,
- Պետք չէ երկար ժամանակ ոտքի վրա մնալ, եթե, այնուամենայնիվ, երկար կանգած մնալու անհրաժեշտություն կա, ապա մի ոտքը ոտքը դրեք աթոռին կամ որևէ փոքր արկղի հենեք,
- Նստելիս մեջքի հետևում բարձր դրեք, ոտքերն էլ հենեք աթոռին,
- Երբ քնելիս աջ կամ ձախ եք թեքվում, ապա ոտքերի արանքում բարձ դրեք,
- Կատարեք բժշկի առաջարկած մարզանքները, որպեսզի մեջքի մկանները ուժեղանան և ցավը մեղմանա,
- Եթե ցավը մեջքից իջնում է ավելի ներքև, այնուհետև տարածվում է որովայնում և 1 ժամից ավել է տևում, ապա անհապաղ դիմեք բժշկի, դա կարող է ժամանակից շուտ սկսվող նախածննդաբերական ցավեր լինել:
Արյունահոսություն և լնդերի այտուցվածություն
Արյան շրջանառության և համապատասխան հորմոնների մատակարարման ծավալի մեծացումը կարող է հանգեցնել լնդերի արյունահոսության և այտուցվածության:
Խորհուրդներ
- Խնամեք ատամները և լնդերը, մի՛ մոռացեք ատամները կանոնավոր մաքրելու և ատամների մաքրման թել օգտագորեծելու մասին,
- Հղիություն պլանավորելիս ստուգվեք ստոմատոլոգի մոտ՝ համոզվելու համար, որ ատամներն ու լնդերն առողջ են:
Փորկապություն
Հորմոններն, ինչպես նաև՝ վիտամինային ու երկաթի հավելումները կարող են փորկապության պատճառ դառնալ: Փորկապություն է առաջանում նաև այն ժամանակ, երբ արգանդը ճնշում է գործադրում ուղիղ աղիքի վրա:
Խորհուրդներ
- Սննդակարգում ավելի շատ մանրաթելեր ավելացրեք (թարմ միրգ ու բանջարեղեն օգտագործեք),
- Շատ հեղուկ օգտագործեք,
- Առավոտյան տաք հեղուկ օգտագործեք,
- Ամեն օր ֆիզիկական վարժություններ կատարեք:
Քնի խանգարում
Հատկապես հղիության ուշ շրջանում քնելու հարմար դիրք գտնելը ավելի է դժվարանում:
Խորհուրդներ
- Մի՛ օգտագործեք քնաբեր միջոցներ,
- Քնելուց առաջ տաք կաթ խմեք,
- Քնելուց առաջ տաք ցնցուղ կամ վաննա ընդունեք,
- Երբ քնելիս թեքվում եք, ապա ոտքերի արանքում բարձ դրեք, ձախ կողմի վրա թեքված քնելը հղի կանանց համար առավել հարմար է, բացի այդ՝ լավացնում է արյան շրջանառությունն ամբողջ մարմնում:
Գլխապտույտ
Խորհուրդներ
- Երկար ժամանակ ոտքի վրա մնալիս՝ անպայման քայլեք,
- Պառկած կամ նստած տեղից կտրուկ մի՛ բարձրացեք:
Հոգնածություն
Օրեցօր աճող երեխան լրացուցիչ էներգիա է պահանջում, ինչի արդյունքում հնարավոր է, որ անընդհատ հոգնածություն զգաք: Երբեմն հոգնածությունը կարող է պայմանավորված լինել արյան մեջ երկաթի ցածր պարունակությամբ, ինչը հղիության ընթացքում հաճախ է պատահում:
Խորհուրդներ
- Շատ հանգստացեք: Աշխատեք գիշերը վաղ քնել և փորձեք մի քանի ժամ քնել նաև օրվա ընթացքում.
- Ամեն օր մարզվեք՝ էներգիայի մակարդակն ավելացնելու համար,
- Եթե կարծում եք, որ արյան մեջ երկաթի պակասը շատ է անհանգստացնում ձեզ, ապա դիմեք բժշկի և արյան անալիզ հանձնեք:
Հաճախամիզություն
Առաջին եռամսյակում աճող արգանդը և երեխան ճնշում են միզապարկը, որը հաճախ միզելու անհրաժեշտություն է առաջացնում: Հաճախամիզություն կարող է առաջանալ նաև այն ժամանակ, երբ երեխայի գլուխը ծնվելուց առաջ ներքև է իջնում:
Խորհուրդներ
- Խուսափեք ձգող ներքնազգեստ և տաբատ կրելուց,
- Եթե միզապարկում այրոցի զգացում կամ ցավ ունեք, ապա անհապաղ դիմեք բժշկի, դա կարող է վարակի նշան լինել:
Գլխացավ
Գլխացավերի առաջացման հաճախականությունը և ցավի աստիճանը կարող են հղիության ընթացքում անընդհատ փոփոխվել:
Խորհուրդներ
- Ճակատին և պարանոցի հետևում սառցե պարկ դրեք,
- Պառկեք թույլ լուսավորված սենյակում, փակեք աչքերը, փորձեք հանել մեջքի, մկանների, ուսերի լարվածությունը,
- Եթե գլխացավերը ուղեկցվում են սրտխառնոցով, տեսողության աղոտացմամբ, ապա անհապաղ դիմեք բժշկի:
Արյոց կամ մարսողության խանգարում
Այրոցը այրման զգացողություն է, որն առաջանում է որովայնում և թվում է, թե կոկորդ է բարձրանում: Հղիության ընթացքում այրոց է առաջանում, որովհետև կնոջ մարսողական համակարգը հորմոնների մակարդակի փոփոխման արդյունքում դանդաղ է աշխատում: Բացի այդ, մեծացած արգանդը կարող է հրել ստամոքսը՝ ստամոքսաթթուները բարձրացնելով վերև:
Խորհուրդներ
- Օրվա ընթացքում սնվեք փոքր չափաբաժնով և հաճախ,
- Կերեք դանդաղ,
- Խմեք տաք հեղուկներ, օրինակ՝ խոտաբույսերով թեյ,
- Խուսափեք տապակած սննդից և այնպիսի ուտելիքներից, որոնք կարծում եք, որ դժվար եք մարսում,
- Ուտելուց անմիջապես հետո մի՛ պառկեք,
- Երբ պառկում եք, ապա հետևեք, որ գլուխը ավելի բարձր դրված լինի, քան ոտքերը կամ բարձը դրեք ուսերի տակ, որպեսզի թույլ չտաք, որ ստամոքսաթթուները բարձրանան կրծքավանդակ:
Թութք
Հղիության ընթացքում փոքր կոնքի անոթների ճնշվածության արդյունքում հնարավոր է, որ հետանցքի շրջանի և ուղիղ աղիքի երակները լայնանան և թութք առաջանա:
Խորհուրդներ
- Փորձեք խուսափել փորկապությունից: Փորկապությունը կարող է թութք առաջացնել կամ թութքն ավելի ցավոտ դարձնել,
- Երկար ժամանակ կանգնած կամ նստած մի՛ մնացեք, հաճախ փոխեք ձեր դիրքը,
- Ջանք գործադրեք, որպեսզի աղիքի շարժի ընթացքում չլարվեք,
- Օրվա ընթացքում մի քանի անգամ տաք վաննա ընդունեք,
- Խուսափեք ձգող ներքնազգեստ, տաբատ կրելուց,
- Մշտապես խորհրդակցեք բժշկի հետ:
Ոտքերի ջղաձգում և ցավ
Աճող արգանդի ճնշումը կարող է առաջացնել ոտքերի ջղաձում և սուր ցավեր:
Խորհուրդներ
- Անպայման օգտագործեք այնպիսի սնունդ և ըմպելիքներ, որոնք հարուստ են կալցիումով,
- Հարմար կոշիկ կրեք,
- Փորձեք ձգող գուլպաներ կրել, բայց ոտքերի վրա շատ ճնշում չգործադրել,
- Խուսափեք մեջքի վրա պառկելուց, քանի որ ձեր քաշը և աճող արգանդի ճնշումը կարող են ոտքերի արյան շրջանառությունը դանդաղեցնել, ինչը հնարավոր է, որ ջղաձգումներ առաջացնի:
Սրտխառնոց և փսխում
Սրտխառնոց կարող է առաջանալ օրվա ցանկացած ժամին, սակայն ամենից հաճախ դա լինում է առավոտյան, երբ ստամոքսը դեռ դատարկ է: Սրտխառնոցը հորմոնալ փոփոխությունների արդյունք է և առաջանում է հատկապես հղիության առաջին ամիսներին, քանի որ օրգանիզմը դեռ նոր է հարմարվում արտադրվող հորմոններին:
Խորհուրդներ
- Եթե սրտխառնոցն առաջանում էառավոտյան, ապա չոր սնունդ կերեք: Օգտագործեք սպիտակուցով հարուստ սնունդ:
- Ամբողջ օրվա ընթացքում հեղուկ օգտագործեք: Հեղուկը միանգամից կուլ մի տվեք՝ խմեք կում-կում,
- Խուսափեք յուղոտ և տապակած սննդից,
- Անհապաղ դիմեք բժշկի, եթե փսխումները շատ հաճախակի են:
Թարգմանված նյութի սկզբնաղբյուրը՝ Cleveland clinic
Աղբյուրը՝ Doctors.am
