Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտը հանրապետության եզակի հիմնարկներից է, որն ապահովում է հանրապետության բոլոր քաղաքների ու գյուղերի ոչ միայն հղիության ընթացքի որևէ հիվանդությամբ տառապող բարձր ռիսկի խմբի հղիների հետազոտությունը, դրանց բարդությունների կանխարգելումը և ծննդալուծումը, այլև ցուցաբերում է բուժական, կազմակերպչական, մեթոդական օգնություն հատկապես մարզերի ծննդօգնության հիմնարկներին, ինչպես նաև տեղերում, արագ արձագանքման բրիգադով իրականացնում է շտապ, անհետաձգելի բուժօգնություն:
ՎԱՊՄԳՀԻ-ը ծննդօգնության այն հիմնարկներից է, որտեղ ընդունվում են որևէ հիվանդությամբ և հղիության հետ կապված բարդություններով հղիներ, ծննդաբերներ և ծննդկաններ, ինչպես նաև թարախասեպտիկ մանկաբարձական և գինեկոլոգիական ծանր հիվանդներ: Ինստիտուտը սպասարկում է նաև Արցախից և Ջավախքից ուղեգրված բարդացած հղիներին, ծննդաբերներին և գինեկոլոգիական հիվանդներին:
Բուժաշխատողների ընդհանուր թիվը 345, որից 85 բժիշկ և 120 միջին բուժաշխատող:
ՎԱՊՄԳՀԻ-ի աշխատակիցների կողմից գրվել են մայրենի լեզվով հրատարակված բոլոր դասագրքերը, մենագրություններն ու ուղեցույցները, մշակվել է «Վերարտադրողական առողջություն» օրենքը և Վերարտադրողական առողջության բարելավման ազգային ծրագիրը», բազմաթիվ նորմատիվ փաստաթղթեր և ծրագրեր:
Ինստիտուտը Երևանի պետական բժշկական համալսարանի հիմնական բազան է, որտեղ ուսանում են ինչպես տեղացի, այնպես էլ օտարերկրյա ուսանողներ /Հնդկաստան, Իրան, Վրաստան, Սիրիա, Լիբանան, Ռուսաստանի Դաշնություն և այլն/, ստանալով նախա- և հետդիպլոմային կրթություն:
